වයෝවෘද්ධ ගිලන් භික්ෂු විවේකාරාමය – බද්දේගම
ජ්‍යෙෂ්ඨ පුරවැසි නිවාස
වර්‍ෂ 1961 ක් වූ ජූලි මස 30 වැනි දින උත්සවශ්‍රීයෙන් ආරම්භ කරන ලද මෙම පුණ්‍යායතනය ලොව බිහිවූ ප්‍රථම වයෝවෘද්ධ භික‍ෂු විවේකාරාමය වශයෙන් අප ඉතිහාසයේ නව වාර්තාවක් තැබුවේය. ගම් පියසම සුන්දර කරමින් මහා සාගරය දක්වා ගමන් යන සුන්දර ගිං ගඟ නිසා සරුසාර කරන කෙත් යායක් එක් පසෙකින් ද අනෙක් පසින් දකුණු ලක අග නගරය දක්වා දිවෙන ජනාකීර්ණ මහා මාර්ගයෙන් ද වට කරන ලද මෙම පිං බිම කුඩා කඳු ගැටයක් මත හාත්පස බබළවමින් මනස්කාන්ත දර්ශනයක් මවා පායි.
ඉතිහාසයෙන් බිඳක්
හැටේ දශකයේ මෙරට සමාජසේවා ගරු අමාත්‍යධුරය හෙබවූ මෛත්‍රීපාල සේනානායක මැතිඳුන්ට වයෝවෘද්ධ ගිලන් භික්ෂූන් වහන්සේලා උදෙසාම වෙන්වූ ආයතනයක් පිහිටුවීම පිළිබඳ උදාර සංකල්පය එවකට බෞද්ධ මහා සම්මේලනයේ ගරු සභාපති ධුරය ඉසිලු දෘෂ්ඨි විශේෂඥ ඇල්බට් එදිරිසිංහ මැතිඳුන්ට සැළකර සිටින ලදී. මේ පිළිබඳ කඩිනම් පියවර ගත් එතුමා මෙම ආයතනය තම නිජබිම තුළම ස්ථාපිත කළ යුතුය යන දැඩි අධිෂ්ඨානයෙන් යුතුව ගමට ඉතාමත් හිතවත් වූ එමෙන්ම මෙබඳු සත් ක්‍රියාවක් සඳහා නොපැකිළ ඉදිරිපත් වන බව නොවළහා වටහාගත් එතුමා එවකට හැඩිදෙමළාකන්දේ පුරාණ විහාරාධීෂ්වර ගාලූ කෝළයේ ප්‍රධාන සංඝනායක ධුරයෙන් පිදුම් ලබා සිටි පිං කෙතක් වූ අතිපූජ්‍ය ගණේගම සරණංකර නාහිමිපාණන් වෙත දන්වා සිටියේය. කරුණා පිඬක් වූ නාහිමිපාණෝ ස්ථීර අධිටනින් යුතුව තම විහාරස්ථානය සතුවූ කීඹීඇල විජයවර්ධනාරාමය මේ සත්ක්‍රියාව උදෙසා කැප කරන ලදී. එදා විහාරස්ථානය සතු වූ සංඝාවාසය තුළ මෙම ආයතනය පිහිටුවනු ලැබුවත් අද වන විට ඒ සඳහාම වෙන් වූ අංග සම්පූර්ණ දැකුම්කළු ගොඩනැගලි සංකීර්ණයක් බවට පත්වී ඇත.
නේවාසික භික්ෂූන්වහන්සේ තම ජීවිතයේ අගභාගයේ කිසිවෙකුගේ පිහිටක් නොලැබුවත් තම වටිනා ජීවිතය ම සාසනය වෙනුවෙන් කැප කළ දායක කාරකාදීන්ගේ දුක සැප දෙකේදී අතදී ක්‍රියා කළ එහෙත් අද අසරණව තමාගේ සැදෑ කාලය ගෙවන අසරණ වූ ගිලන් වූ භික‍ෂූන් වහන්සේ 14 නමක් මේ වන විට මෙම ආයතනයේ සැනසිල්ලේ ගතකිරීමට අවස්ථාව උදාකර ඇත. මෙය ලක්වැසි බෞද්ධ අබෞද්ධ කාගේත් ගෞරවයට පත්වී ඇත. මෙම ආයතනයට යම් කෙනෙක් පැමිණියොත් ආයතනයේ භික‍ෂූන් වහන්සේලා විඳින සැනසිල්ල ගැන දැක සතුටුව ආයතනයේ දායකත්වය අපේක‍ෂා කිරීම සුලභ දසුනකි. මේ නිසාම දිවයින පුරා විසිරුණු විශාල දායක පිරිසකි. වර්ෂය පුරා අඛණ්ඩව දානය සැපයේ. සිව්පස මැනවින් ලැබේ.
President – Attorney Priyankara Liyanage
Secretary – Samuel Adhihetti
Treasurer – Mr. Mithrapala Panditharathna
